Su'aal: Cirbad dhabarka la iiga duray markaan foolanayay?

[Zuuzuu]

Asc dr su aal murug igu heso ban raba ina ku weydiiyo dr wax dhabarka la iiga duray markan folanayay cirbid xanunka baa bi iso ay igu dhahen dhaqtirta xanunke kaa yarenesaa dadka qarna waxay ileyhn cirbidas ma fiicno waa halis dhabarka hadhow ayuu xanun kugu so bilawaya anigana waxas ma arko 3month ayaana sii maraya dr qer allha ku siyo iga so jwb plz jazakallh

[SomaliDoc]

Waa maxay cirbadda joojiso xanuunka foosha?
Cirbadaan waxay si kooban u xannibtaa dareenka xanuunka la dareemo xilliga foosha, waxaana loo yaqaanaa "Epidural block", waa nuuc ka khafiifsan cirbadda lagu suuxiyo qeybta hoose ee jirka markii hooyada lagu qalaayo ilmaha, waayadaan dambane aad ayaa loo isticmaalaa cirbadda joojiso xanuunka foosha, waxaana lagu qiyaasaa boqolkiiba 50% haweenka ku dhala yurub iyo maraykanka in cirbadaan codsadaan si xanuunka uga yaraado.

Dhibaatada ay leedahay cirbadaan waxaa ka mid ah:

• Cadaadiska dhiigga inuu hoos u dhaco, sidaa darteed qofka inta aan la durin waxaa badanaa lagu xiraa faleebooyin xididka ah, inta uu qofka foolanayane waa in si joogto ah loola socdaa cadaadiska dhiigga, maadaama si kadis ah hoos ugu dhici karo.
• In dareeraha xangullaha uu banaanka u soo baxo, waana arrin ku dhacdo haweenka boqolkiiba 1%, arintaan waxay keentaa madax xanuun siyaado ah, qofkane mar labaad ayaa laga duraa dhabarka iyadoo la adeegsanayo dhiigiisa si madax xanuunka loo joojiyo.
• Waxaa dhacdo mararka qaar in maadaama xanuunka yaraaday in hooyada ay iska hurudo oo cunugii riixi wayso, taasoo halis galin karta uurjiifka, waxaana markaas hooyada la siiyaa daawooyin kale oo foosha kululeeyo.
• Foosha ka dib waxaa laga yaabaa inaad muddo kooban sii dareentid kabaabyo qeybta dambe ee jirka ah, qofkane wuxuu u baahnaan doonaa in la garab galo markuu soconayo.
• Waxaa dhacdo mararka qaar inkastoo dhif tahay in meesha dhabarka lagaaga muday cirbadda inay kabuubyo joogto ah yeelato, taasoo dareenka maqaarka ka maqnaado.
• Waxaa jira cilmibaarayaal sheegay in hooyada dhabarka lagaga mudo cirbadaan inay cunugeeda dhib kala kulmo naas nuugista marka ugu horayso oo uu qabsan waayo, laakiin maahan arrin la isku wada raacsan yahay.

Maxaa Talo Ah?
Maadaama ay dhici karaan dhibaatooyinka kor ku xusan, badanaa waxay dhakhaatiirta ku taliyaan in cirbadaan la qaato markii hooyada ay tabar dhigto foosha darteed ama uurjiifka uu daalo si ay u nasato, laakiin badanaa waxaa cirbadaan codsado haweenka foolanayo dhakhtarka ka sokow, marka waa muhiim in hooyooyinka lala socodsiiyo cirbadaan iyo waxyaabaha la filan karo, dhakhaatiirtane ay taxaddar siyaado ah muujiyaan.
Akhriso qoraal ku saabsan qalliinka uurka: http://somalidoc.com/smf/index.php?topic=1103.0
Haddii aad su'aalo caafimaad ah qabtid, ku soo gudbi halkaan: http://somalidoc.com/smf/index.php?board=31.0
http://somalidoc.com